Намунаи Ваколатнома
Ваколатнома. Ваколатнома чунин навъи ҳуҷҷат аст, ки дар он соҳиби ҳуҷҷат ба ҳайси як шахс ё як идораву корхонаи салоҳиятддор ҳуқуқ ва ваколати молӣ ё пулии худро ба ягон шахс ё идораву корхонаи дигар вогузор мекунад. Шахси фоил, яъне соҳиби ваколатро ваколатгузор ва шахси мафъул, яъне шахсе, ки ҳуҷҷат ба номи он навишта мешавад ва ҳуқуқи чиз ба ӯ вогузор мегардад, ваколатгир мегӯянд.
Дар ваколатнома тамоми мушаххасоти шахси фоил ва шахси мафъул дақиқан қайд карда мешаванд.
Мушаххасоти ин ҳуҷҷат чунинанд:
1. Номи ҳуҷҷат
2. Мӯҳтавои матни ҳуҷҷат:
а) аввалан, сабти ному насаб, ҳайсияти иҷтимоӣ, шиноснома, суроғаи шахси фоил ва, баъдан, шахси мафъул;
б) қайди дақиқи миқдори чиз (мол, пул), агар мол бошад, овардани рақамҳои шаҳодатномаи мол, агар пул бошад, овардани рақамҳои махсуси он
3. Имзо ва ному насаби ваколатгузор
4 Сабти таърихи навишти ҳуҷҷат
5. Тасдиқи муассиса ё шӯъбаи марбути ин навъи ҳуҷҷат аз ҷониби шахси масъул
6. Мӯҳр, имзо ва ному насаби шахси масъул ва тасдиқкунанда
7. Сабти таърихи навишти ҳуҷҷат
Намуна:
Ваколатнома
Ман, Собиров Сорбон Акрамович, донишҷӯйи соли якуми факултаи таърихи ДМТ, дорои шиносномаи таҳти № … ва силсилаи … ба Салимова Нафиса Далеровна, донишҷӯйи соли дуввуми факултаи дандонпизишкии ДДТТ, дорои шиносномаи таҳти № … ва силсилаи … ваколат медиҳам, ки бастаи аз шаҳри Маскав ба номи ман фиристодаро аз шӯъбаи № 3 Маркази алоқаи ш. Душанбе бигирад.
/имзо/ Ному насаби соҳиби ҳуҷҷат (ваколатгузор)
Таърихи навишти ҳуҷҷат
Имзои Собиров С. А.- ро
тасдиқ мекунам. Сармуҳосиби
шӯъбаи алоқаи № 3 Маркази
алоқаи ш. Душанбе
Мӯҳр /имзо / Ному насаб
Таърихи тасдиқи ҳуҷҷат